窮學生 富學生

事先聲明，雖然我有好多part time同freelance，但我仍然是個不折不扣的窮學生。

如果你係好有錢，我諗你唔會明白我依一篇日記。

因為要畢業的關係，這一個學期，我要讀一個好有文藝氣息的英文班 - 莎士比亞。

雖然對莎叔唔係好反感，不過每一次睇莎叔作品都覺得佢好長氣，而且那些英文真係睇到我叫救命，上堂時釣魚多過聽書。

不過讀讀下先知，原來選依個course嘅同學可以免費去Hong Kong Arts Festival睇The Tempest，重要係靚位，即時覺得成件事爽曬，好似突然「升呢」做個文藝青年，上堂悶d都唔緊要。

今日上堂有同學問星期日幾點集合，個鬼佬professor就超興奮噤答，

(所下內容經馬田亨中文翻譯)

「這是一個好問題，我相信好多同學都唔知道點去演藝學院，所以我地會一齊食飯，一齊去。」鬼佬professor仍然好興奮噤講。

「嘩，又有戲睇，又有飯食，正!!」身旁的輝即時勁開心講。

「應該唔會請我地食掛?」我笑笑口回應。

雖然我都好想有人請我食飯，不過我嘅理智話俾我知係冇可能。

鬼佬professor再次開口，

「我地一齊食飯，大約係$250一個人.....」

oh my god!!!!!!!$250一個人?????

我同阿輝聽到都嚇左一嚇，估唔到有得免費睇話劇，換泥嘅代價係要食貴野。

作為一個窮學生，$250足夠我食足差唔多一個星期，我懷疑間餐廳係個鬼佬professor開，目的係為左抽我地commission，同時間，又開始擔心唔去食飯會呂會fail左個course。

「不過我知$250對同學泥講係好貴，我地會食平D，大約150左右啦!」鬼佬professor再說。

雖然我覺得$150都可以接受，不過仍然貴左D，尤其係同一班完全唔識嘅同學一齊。

我身邊大部份同學(唔識的)都顯得超興奮，當鬼佬professor問大家食印度菜，泰國菜定馬來西亞菜時，我見到佢地真係好熱切地討論，依個時候，喺我眼中，好似見到一班著住西裝，飲住紅酒嘅上流人士喺到開緊party，談笑風生，無論係$250定$150，對佢地泥講，根本唔算係咩。

果一刻，我同阿輝對望，開始明白中產家庭同草根家庭嘅分別。

阿輝，星期日，麥當當見!